Zhvillohet ceremonia e çeljes së vitit të ri shkollor

Ditën e hënë, më datë 12.09.2011 u zhvillua ceremonia e çeljes së vitit të ri shkollor 2011-2012 në shkollën “Nxënësit e Mesdheut”, pjesë e Albanian Qatar College. Në këtë ceremoni merrnin pjesë mësues, nxënës, prindër dhe përfaqësues të Albanian Qatar Foundation. Në fjalën e hapjes drejtoresha e shkollës znj. Loreta Terihati u uroi nxënësve një vit të mbarë shkollor duke parashtruar në vija të përgjithshme objektivat e shkollës që do t’i shërbejnë ngritjes së nivelit edukativo-mësimor gjatë këtij viti shkollor, duke përshëndetur në mënyrë të veçantë vogëlushët e klasës së parë fillore të cilët ulen për të parën herë në bankat e shkollës.

Në vazhdim përshëndetën kryetari i Bordit të Prindërve Z. Arjan Imeraj dhe presidentja e qeverisë së nxënësve znjsh. Eleni Cibuku. Më tej u zhvillua një program artistik me këngë, recitime, humor dhe lojëra zbavitëse, ku u krijua një atmosferë e gëzueshme festive për të gjithë.

Vlen të theksohet se këtë vit shkolla e ka zgjeruar aktivitetin e saj  me ciklin fillor nga klasa e parë deri në të pestën. Ceremonia përfundoi me një koktel për të gjithë të pranishmit dhe me shpërndarjen e disa dhuratave për fëmijët për t’ia lënë vendin më tej zhvillimit të orës së parë të mësimit.