Te Reja

Kryetari i Bashkisë së Tiranës Lulzim Basha ka nënshkruar marrëveshjen e binjakëzimit mes Tiranës dhe Dohas. Marrëveshja e nënshkruar mes mes Kryetarit të Bashkisë së Tiranës Lulzim Basha dhe Kryetarit të Bashkisë së Dohas Mohammed Ahmed Al-Sayed i hap rrugë bashkëpunimit mes dy qyteteve në fusha si infrastruktura, ndërtimi, shërbimet etj.

Kryetari i Bashkisë se Dohas shprehu kënaqësinë që i jepej mundësia edhe përmes kësaj marrëveshje të ndihmonte homologun shqiptar në projektet e tij ambicioze sikur vlerësoi se kjo është marëveshja e pestë që Doha nënshkruan me qytete të tjera në mbarë botën.

Lexo më shumë...

Albanian Qatar Foundation ka nisur fushatën e radhës për sensibilizimin e komunitetit për dhurimin vullnetar të gjakut, në vazhdim të projektit “Dhuro gjak, shpëto jetë!” me synimin për t'u ardhur në ndihmë të sëmurëve talasemikë.

Fondacioni ju fton të bëheni pjesë e kësaj nisme humane dhe të dhuroni gjak për pacientët që kanë aq shumë nevojë për të.

Vlen të përmendet se kjo është faza e tetë e projektit “Dhuro gjak, shpëto jetë!”, i cili ka nisur në vitin 2008 dhe se në 7 aktivitetet e para numri i dhuruesve vullnetarë të gjakut ka arritur në rreth 160 vetë.

Ky aktivitet organizohet në bashkëpunim me Qendrën Kombëtare të Transfuzionit të Gjakut dhe Kryqin e Kuq Shqiptar nën kujdesin e stafit mjekësor në mjediset e Albanian Qatar Center ditën e enjte datë 29.02.2012 nga ora 12.00 deri në orën 18.00.

Me rastin e kujtimit të lindjes së Profetit Muhamed (a.s.),  më dt. 4 shkurt 2012, u mbajt në kryeqytet simpoziumi me temë: “Profeti Muhamed a.s. - Shembulli më i bukur”, organizuar nga Komuniteti Mysliman i Shqipërisë, në të cilin morën pjesë ministri i Turizmit, Kulturës, Rinisë dhe Sporteve, z. Aldo Bumçi, drejtues të komuniteteve fetare, përfaqësues të trupit diplomatik, emra të njohur të jetës kulturore dhe shoqërore, si dhe besimtarë që kishin ardhur nga Tirana dhe nga rrethet për të përkujtuar ditën kur lindi Profeti i Profetëve dhe krijesa më e dashur e Zotit të gjithësisë.

Lexo më shumë...

U bënë 10 vjet që është themeluar Albanian Qatar Foundation, i cili ka ndihmuar nëpërmjet projketeve të larmishme në zbutjen e varfërisë dhe zhvillimin e shoqërisë shqiptare e të rinjve e të rejave në veçanti përmes trajnimeve dhe aktiviteteve.

Vlen të theksohet se Albanian Qatar Center për Gjuhë të Huaja dhe Kompjuter vazhdon të jetë ndër projektet kryesore të Fondacionit dhe gjatë këtyre 10 vjetëve janë trajnuar pranë kësaj Qendre rreth 5000 kursantë në gjuhë të ndryshme dhe programe kompjuterike.

Po ashtu, Qendra e Gjuhës Arabe është e para qendër e specializuar për mësimin e kësaj gjuhe në rajonin  e Ballkanit me mësues të huaj të specializuar dhe programe mësimore tepër praktike.

Lexo më shumë...

Presidenti i Republikës Bamir Topi priti Ambasadorin e ri të Katarit në vendin tonë z. Jusef Bin Hasan Al Sai me rastin e paraqitjes së Letrave-Kredenciale. Gjatë këtij takimi u vlerësuan marrëdhëniet dypalëshe dhe thellimi i tyre në në ardhmen në të gjitha fushat me interes të ndësjelltë, sidomos pas hapjes së dy ambasadave në vendet respektive. Vlen të theksohet se Emiri i Shtetit të Katarit Sheik Hamad Bin Khalifa Al-Thani, vizitoi Shqipërinë tetorin e kaluar dhe u takua  me krerët më të lartë të shtetit dhe u firmosën disa marrëveshje dypalëshe që përfshijnë bashkëpunimin në mbrojtjen e investimeve, bashkëpunimin në fushën e turizmit, në kulturë, në shërbimet ajrore dhe shmangien e tatimit të dyfishtë.

Ashtu siç ishte paralajmëruar, në kuadër të projektit human “Shqiptari për Shqiptarin”, Albanian Qatar Foundation, ditën e enjte më datë 15 dhjetor 2011, bëri të mundur shpërndarjen e 14 000 veshjeve (10 000 veshmbathje të përdorura dhe 4 000 të reja). Nga kjo shpërndarje përfituan 800 familje në nevojë, nga të cilat 600 prej familjeve të varfëra me fëmijë jetime që përkrah vazhdimisht Fondacioni nëpërmjet projekteve të tij dhe 200 familje të tjera jetimësh.

Ky aktivitet u zhvillua në bashkëpunim me disa shoqata që operojnë në ofrimin e ndihmave sociale për familjet në nevojë dhe me xhamitë e qytetit të Tiranës.

Fondacioni gjen rastin të shprehë falënderimet më të sinqerta për të gjithë bashkëpunëtorët që kontribuan në realizimin me sukses të fazës së radhës së këtij projekti dhe në mënyrë të veçantë Xhaminë e Medresesë dhe drejtuesin e saj z.Lulzim Plloçi për ndihmën e vyer në grumbullimin e veshjeve për t’u ardhur në ndihmë njerëzve në nevojë.

Albanian Qatar Foundation në bashkëpunim me Komunitetin Mysliman të Shqipërisë organizuan Konkursin e Dytë në Shqipëri të emërtuar "Emiri i Shtetit të Katarit" për mësimin përmendësh të Kuranit Famëlartë.

Në këtë konkurs morrën pjesë rreth 50 konkurentë nga rrethe të ndryshme të vendit, që i përkisnin moshave të ndryshme.

Juria e këtij konkursi, e përbërë nga njohës të mirëfilltë të Kuranit dhe fushave të tij H.Urim Rexhepi, Prof. Ahmed Hussein dhe H. Abdullah Nela gjatë vlerësimit mori parasysh mësimin korrekt të Kuranit nga konkurentët, përpikmërinë e rregullave të shqiptimit dhe zërat melodiozë. Në fund të Konkursit u zhvillua ceremonia e shpalljes së fituesve, të cilët janë: Besnik Quku, Fatime Bardhoshi, Ilir Hajrulla, Sara Hasani, Belkisa Balliu, Elmira Cekaj dhe Amar Ahmed. Gjatë ceremonisë u shpërndanë certifikata për pjesëmarrësit dhe dhurata për fituesit.

Albanian Qatar Foundation gjatë muajit Dhjetor 2011 shpërndau 1000 uniforma shkollore për shkollat 9–vjeçare të zonave periferike të kryeqytetit, përkatësisht Shkollat  “Zall Herr”, “Paskuqan” dhe “Romanat”. Ky aktivitet u zhvillua në bashkëpunim me Drejtorinë Arsimore të rrethit, në kuadër të nismës së Fondacionit për të pajisur me uniforma nxënësit e shkollave në zona me nevoja të mëdha ekonomike. Gjatë shpërndarjes së këtyre uniformave u zhvilluan ceremonitë përkatëse me pjesëmarrjen e pëfaqësuesve të Fondacionit, drejtues, mësues dhe nxënës të shkollave të sipërpërmendura dhe përfaqësues të pushtetit lokal.

Në fjalën e tij, z.Fatos Rexha kryetar i Komunës Paskuqan vlerësoi aktivitetet bamirëse në vazhdimësi të Fondacionit në komunën që ai drejton në ndihmë të njerëzve në nevojë.

Departamenti i Fëmijëve Jetimë është çelur që në hapat e para të themelimit të Albanian Qatar Foundation dhe ka të bëjë me përkrahjen e fëmijëve jetimë. Këtë vit Fondacioni e ka rritur numrin e jetimëve që mbështet me pensione mujore prej (30 - 40 $). Tashmë 1200 fëmijë jetimë të moshës nga 6-17 vjeç përfitojnë dhe nëpërmjet organizimit të aktiviteteve edukativo-arsimore, social-kulturore, argëtuese dhe trajnimeve, kryesisht në fushën e gjuhëve të huaja dhe informatikës.Vlen të përmendet se fëmijët jetimë në Fondacionin tonë janë pjesë e pandashme e projekteve humane sezonale, duke përfituar ndihma ushqimore, mish, mjete mësimore, veshje, dhurata të ndryshme etj.

Lexo më shumë...